Reunión do BNG co Comité de Empresa do Hospital Virxe da Xunqueira.

O pasado martes 22 de xuño tivo lugar en Cee unha reunión entre o voceiro nacional do BNG, Guillerme Vázquez e o Comité de Empresa do Hospital Virxe da Xunqueira.
Nesa reunión o Comité de Empresa tivo a oportunidade de explicar as distintas problemáticas existentes no HVX.

Celadores.
A presidenta do Comité de Empresa explicoulle ao voceiro do BNG que os únicos hospitais de Galicia que non teñen celadores son o Virxe da Xunqueira e o da Barbanza. Tamén se explicou a sobrecarga que supón para o resto de categorías o feito de ter que asumir as funcións de celador, ademáis das súas propias, coa conseguinte repercusión sobre a calidade asistencial que se lles ofrece aos doentes, ratificando así a consideración da Xunta de que tanto os traballadores coma os cidadáns da Costa da Morte somos de segunda categoría en comparación co resto de hospitais do Sergas.
Tras esta exposición, Guillerme Vázquez calificou esta situación de inadmisible e incompresible, e comprometeuse a presentar unha iniciativa parlamentaria para a dotación da categoría profesional de celador nestes dous hospitais.
Ligado a este tema falouse da diminución da contratación que se está a producir neste último ano e que ve agravada pola situación de falta de celadores e porque os cadros de persoal están sempre baixo mínimos (tal e como se puido constatar na última folga onde os servizos mínimos determinados correspondían nun 80% coas presenzas dun día laboral normal), xa que con menos persoal hai que sacar adiante o mesmo volume de traballo.

Servizo de radioloxía.
Igualmente a presidenta do Comité de Empresa expúxolle ao voceiro do BNG, a experiencia piloto que pretende levar a cabo o Sergas cos servizos de radioloxía dos hospitais comarcais (Cee-Ribeira-Salnés e Barco-Monforte-Verín) substituindo as gardas localizadas por un radiólogo remoto compartido para cada tres hospitais. O voceiro do BNG amosou a súa preocupación coa política que está a levar o goberno do PP en Galicia, posto que con este modelo o que se está intentando é implantar un modelo privatizador da Sanidade Pública, o cal vai en detrimento da calidade asistencial nos hospitais de Galicia. Recoñece que neste momento este tema vai a ser difícil de tratar pero que estase a dar un movemento social en defensa da sanidade pública, grazas ao cal daran a batalla no Parlamento para evitar a privatización da Sanidade Pública galega.

Unha vez celebrada esta reunión queremos aproveitar esta publicación para animar ao resto de forzas políticas para que se poñan en contacto co Comité de Empresa e así poder transmitirlles de primeira man as nosas inquedanzas.

COMUNICADO DE PRENSA

O Comité de Empresa do HVX quere denunciar públicamente a pretensión da Consellería de Sanidade de reducir gasto público a costa de pór en risco a atención sanitaria que se presta no HVX.
A Consellería de Sanidade encabezada por Dª Pilar Farjas Abadía, deu a orde de que os radiólogos dos hospitais comarcais de Cee, Ribeira e Vilagarcía, que ata agora realizaban gardas localizadas pasasen a prestar servizos en gardas de presenza física de maneira rotatoria. De tal maneira que un só radiólogo atendería a demanda dos tres hospitais.
Os radiólogos, durante as gardas localizadas, a día de hoxe, poden ser chamados para a realización de probas radiolóxicas urxentes en calquer momento, valorando en función da patoloxía a máis convinte. Coa nova orde, isto só se virá facendo cando o radiólogo faga a garda no propio centro. Os días nos que esté nun centro distinto, estas probas urxentes non poderían realizarse, obrigando a que o paciente tivese que desprazarse ao Hospital da Coruña e volver novamente a Cee, onde seguiría a súa atención, despois de ter percorridos 200Km en ambulancia.
De cara á galería preténdese reducir gasto, e nós preguntámonos, ¿onde?. Porque o que se aforraría nas gardas, vaise a gastar en probas adicionais e en desprazamentos innecesarios. ¿Ou pretenden aforralo cando os profesionais se neguen a prestar esta temeraria atención e entón a leve a cabo unha empresa privada?. Ou o que non quere é precisamente aforrar.
Con isto queremos informar á poboación que coa nova política da Consellería, a Sanidade Pública vai a sufrir un grave deterioro, deixando á súa sorte á poboación dos hospitais comarcais.